Ich bin d’Lisa-Marie, chume us Muri und bi Leiterin vo de Gruppe Pastitos. Mis Ziil isch es Lehrerin z’werde. Neb de Schuel gahn ich gern go Fotografiere oder unternimme öppis mit Fründe. S’Highlight jedes Jahr find ich s’Sommerlager, insbesondere s’zäme sii am Lagerfüür, aber au alli andere Ahläss sind jedes mal es super Erlebnis!

Ich bin d’Alicia und gange ad Kanti in Wohle. Ih minere Freiziit spiel ich gern Handball, unternimme öppis mit Kollege und natürlich de Blauring. Jedes Johr freu ich mich uf s’Sommerlager und uf alli coole Erläbniss mit minere Gruppe de Pastitos.

Ich bin d’Noëmi, chume us Bünze und bi Leiterin vo de Gruppe Pastitos. Ich mache momentan d’Lehr als FaGe. I minere Freiziit gahni is Blauring, spiele Handball oder mache öppis mit Kollege. Mis Highlight vom Blauring isch gsi, womer imene Bikerclub übernachtet hend und eus 2 kg Ben&Jerrys bstellt hend als Belohnig well mer dur de Tag so wiit gloffe sind, aber au jede anderi Ahlass isch immer weder es mega tolls Erlebnis gsi und ech freu mech uf wiiteri tolli Jahr im Blauring.

Ich bin d’Marilen und mache momentan es Zwöschejahr. Ih minere Freiziit spiel ich Handball und zähle gern Rägetropfe. Ich ben scho siit de 2. Primar im Blauring und jetzt beni Leiterin vo de Gruppe Pastitos. S’Beste am Blauring find ich s’Sommerlager, vorallem s’Scharspiel.

Ich bin d’Charlotte und bsueche d’Kantonsschuel z’Wohle, wohne aber in Fahrwange. Ich bin Leiterin vo de Gruppe Pastitos. I minere Freiziit beni im Blauring und verbrenge gern Ziit met mine Fründe. Ich ben im Blauring, well ich emmer en tolli Ziit gha han, egal öb inere Gruppi oder imene Sola. S’beste im Blauring fend ech s’Sommerlager, wos immer super Esse geht und natürlich au die viele tolle Gruppis.

Ich bin d’Céline und bin Leiterin vo de Gruppe Pastitos. Ich chume us Muri und gahne id Schuel, damit ich mal chan Lehrerin werde. Ih minere Freiziit gahn ich ussert in Blauring no is Handball und unternimme gern öppis mit Fründe. S’Highlight jedes Jahr findi sicher s’Sommerlager, aber au eusi Gruppestunde und alli andere Ahläss, wie s’Pfingstweekend sind jedes mal es super Erlebnis.